Die Vloek

Op ‘n snikhete somersdag in 1890 grawe ‘n boer in die Bosveld, anderkant Middelburg, ‘n leivoor op sy plaas. Onverwags verskyn daar ‘n skedel onder sy graaf. So het hy, in die nog erge woesteny wat Rietvallei toe was, die lewensaar vir sy landerye deur die kopgedeelte van ‘n graf gegrawe. Vyf geslagte later probeer sy nasaat, Alwyn Baayenhoek, die vloek wat op sy familiegrond rus, ontrafel. En hoe maak hy met die grondeis wat oor Rietvallei hang? Die vloek is ‘n spannende en diep ontroerende roman oor die sondes van die vaders wat aan die derde en vierde geslag besoek word. En op die rand van die werklikheid dans daardie onsienlike dinge wat nie met rede verklaar kan word nie.